Maroons scratch a five ‘eer itch!

The start o’ the Season wizna’ gweed
Gettin’ humpit iviry game we played
Then big Craig cam’ ridin’ tae the rescue
Up fae Banff it hiz tae be said

We hid a feelin’ in wir beens
As the Turra Coo we drove by
Thit we cwid maybe grab a win
Bekis wir morale it wiz sky high

We’d been richt doon in the dumps
Bit noo we’re comin’ back
Kin we mak’ it three oot o’ three?
Early doors - hid Turra on the rack

It wiz caul’, an’ windy, an’ dreich
Bit it wiz the same fer baith teams
The Maroons cam’ oot – guns blazin’
Lookin’ fer a barraload it seems

Hardly sat doon on wir seats
Fin we were loupin’ up wi’ a roar
Fa’ else bit James Brownie pult the trigger
That lad fairly kens foo tae score

Wir cheers hid hardly deid doon
Cripes – the Maroons were at it again
Eager beaver Matty Tough fun’ the back o’ the net
Drivin’ Turra fans insane

Bit it wiz nivir gaun tae be easy
Deano’s  team gave as gweed as they got
Fechtin’ tooth and nail
Twa goals doon? - Didna’ maitter a jot!

Turra micht be sittin’ second boddim
Ye widna’ ken the wye they play
Nae geein’ us a meenits peace
Gaun tae score come fit may

Sure enuff they pusht an’ pusht
Eynded up hittin’ oor ingin bag
Bit we’re made o’ stern stuff
Nae wye were we gaun tae sag

It wiz eynd tae eynd fer a spell
Wid Turra manage tae draa’ livil?
They hut wir post, then hut wir bar
Twa close shaves – oochya’ ye divil!

Bit then richt oot o’ the blue
An’ time beginnin’ tae rin oot
Kieran Mooney raced through an’ let fussle
Pit the result bye ony doot

We cheered the boys richt aff the Park
They’d geen their very a’
Deserved the hard focht win
Richt tae the last kick o’ the ba’

Three league wins oot o’ three
The first time in ower five ‘eer
Weel deen tae big Craig an’ the boys
His Michty Maroons – tae them a hefty cheer!!