Fin the Lilies Wilted!

A Hunner’ an’ Aichty nae oot!
Nae darts that we are playin’
The number o’ times we’ve played the Clach
At fitba’ – ye hear fit I’m sayin’?

Afore Setterday – January Twinty Second
A Hunner’ an’ Sivinty Nine games a’tween the twa
Sometimes a’things been kicked 
Aye – even the ba’!

In the bussie we heided up tae Grant Street
The Merkinch – middle o’ Inverness
Nivir an easy grun’ tae win
It’s jist that kin’ o’ place

The pitch wiz hivvy an’ twas windy
Bit oor boys are made o’ stern stuff
Took the game bi’ the scruff o’ the neck
Let Clach see this wiz nae bluff

First half sa’ the ingin’ bag nae touched
Tho’ Scotty Gray an’ Kieran Mooney went near
The Lilies,  afyow shots aff target
Halftime cam’ – nithin’ tae fear

Foo wiz that nae a penalty?
James Brownie a’ tumblin’ wiz sent
The ref he waved play on
Stand linesman, he musta kent!

Clach were haein’ a go
Tho’ we began tae push them back
Matty Tough an’ Mooney pult the trigger
Beginnin’ tae pit them on the rack

In a rare brak-awa’ bi’ the Lilies
Loanee goalie Bal Demus tae the rescue
Twa saves he hid tae mak’
Makkin’ the Merkinchers spew

It wiz beginnin’ tae look lik’ a draa’
Wi’ naebiddy bulgin’ the net
Elivin meenits left on the clock
We widna’ complained – I’ll bet

Ah – bit then we got a corner
Selfie swung ower a beauty
The reidheid o’ Matty rose
An’ the No:9 scored – deein’ his duty

Ya Beezer! - We’re aff wir seats
Howlin’ wi’ joy an’ delight
The Maroons on the Park were delirious
Man – fit a wondrous sight

We were in command bi’ noo
Tho’ Clach were fechtin’ tooth an’ nail
Come on ref – blaa’ yer peeper
An’ leave the hamesters tae gnash an’ wail

Then, fit div ye ken?
In the Boardroom efter full-time
Twa Charlie Simpsons in the same place
Is that nae a horrendous crime? 

This wiz anither landmark of coorse
Oor Twa Thoosan’ Six Hunnerth league game
The day the Lily Whites wilted
Fit a gran’ trip back hame!