The day we stung the Strathspey Jags

A win wiz roon the corner
Lokies an’ Wick we nearly beat
An’ fit we did tae Strathspey Jags
Hid me loupin’ aff ma seat

It wiz written in the stars
Scotty’s Mam an’ Dad were cheerin’
The twa Kierans hid faimily supportin’
Wi’ Dem’s band winderin’ fit they were seein’

The ref he blew his peeper
Wi’ the Maroons playin’ towards the Balloch Hill
Selfie an’ the boys were supercharged
Charlie Broon’s team seen hid their fill

It wiz only a maitter o’ time
Afore the ingin bag wiz bulgin’
Fin midfield star James Brownie
Hid Maroon herts a’ surgin’

“Oh No!” ye cwid hear the groans
As Jags, the ba’ they scrambled hame
Ach – jist a temporary blip
Fer sure – we’re gaun tae win this game

Noo – it wiz Scotty Gray’s Dad’s birthday
An’ tae say his balloon went up
Fin young Scott acrobatically netted
Dad thocht we’d won the Cup!

Time fer a half-time cuppa
Second half kickin’ intae the Balloch Road Eynd
Bit we cwid be deen wi’ anither goal
Fa tae score? - we really didna’ mind

Jist ower an ‘oor hid played
Daylicht wiz fadin’ faist
Young Scott he hit the target
Ye cwid see we wintit the win maist

Twa goals in the last sivin meenits
Nae chance o’ Jags comin’ back an’ draa’in’
We hid them fairly on the back fit
Fer sure – they were puffin’ an’ blaa’in’

Noo – we ken Dem he is a character
An’ a pretty gweed player as weel
His first shot cam’ aff the crossbar
Bit he weaved an’ danced an’ scored – he’s fairly the real deal

The Fifth goal wiz the icin’ on the cake
A feelin’ again we wid score
That man Brownie rammed the ba’ hame
Causin’ the fans tae gie a michty roar!

Jist reward fer a’ the hard wirk
Deen bi’ Craig an’ his backroom boys
Pittin’ a winnin’ team oot on the Park
Nae easy – tae gie the fans their Setterday joys!

Bit bi’ bit the they’re getting’ there
Wi’ wins lik’ against Strathspey
Plunty mair goals an’ thrills
Come 3pm on a Setterday!!

January 2022