Craig Reid - The Goalscorin' Goalie!

Jings, ye’d better believe it
Kiz I sa’ it at first hand
The nicht Craigie Reid scored
I wiz sittin’ in the Huntly Stand

There wizna muckle in it
The first half o’ the game
Fin the Ref he blew his peeper
I hoped the second half wizna the same

Play flew fae eynd tae eynd
In fac’ Keith hid already scored
Lewis Coull hit the back o’ the net
Judged affside? - Nivir – Good Lord!

The Maroons were the better team
As abiddy there cwid see
Fin Huntly scored late on
Wiz it jist nae gaun’ tae be

Bit Keith, they stuck tae the task
They’re made o’ richt stern stuff
Werena’ gaun tae gie up
Wintit tae pit Huntly in the huff

Craig Ewen’s boys kept pushin’
The hame side on the back fit
Wid we mak’ the brakthrough?
Wi’ abiddy deein’ their bit

Then cam’ Lynchie’s corner
Wi’ the seconds tickin’ awa’
Craig toddled up the Park
Made overheid connection wi’ the ba’

It wiz a perfect hit
Landed richt in the ingin bag
Triggered great Maroon Mania
An’ the Huntly heids tae sag

Craigie took aff lik’ a bullet
Team mates chasin’ ahin’
Lik’ Benny Hill in fu’ flow
We’re celebratin’ – makkin’ a din

The ref he blew his fussle
Tae signal it wiz time up
Maroons delirious wi’ delight
Ye’d hiv thocht we’d won a Cup

Craig, he’s saved a puckle
At his ain eynd o’ the Park
Bit that nicht at Huntly
Twiz at the ither eynd he made his mark

A rare feat indeed
In fac’, only twice in a hunner’ ‘eer
That a Keith goalie hiz scored
So – tae Craig Reid – “The Goalscorin’ Goalie” – A Hefty Cheer!!