Fin a Star Wiz Born - John Curran III 70 Nae Oot!!

“Hear ye, Hear ye, Hear ye!”
The Toon Crier wiz heard tae shout oot
“A Bairn hiz jist been born tae fitba’ royalty
Listen carefully, an’ fin’ oot fit it’s a’ aboot”

On the mornin’ o’ Fifteenth February
In the ‘eer o’ 1951
At 10.40 am tae be precise
Eleanor Curran gave birth tae a son

John William Curran wiz his name
He went on tae wirk at the Bar
An’ geen his faimily history
It’s nae surprise he became a fitba’ star

Granda’ Jock led the Curran Fitba’ Dynasty
Awa’ back in Nineteen Oatcakes
A big star in United States o’ America
Jings – scored piles o’ goals for gweedness sakes

J C the Second, then tied on the beets
He became a goalie, wiz talk o’ the toon
Won League and Cups for Keith
He wid nivir let ye doon

Then cam’  J C III – in the summer o’ 1973
Fae Rothes – a winger o’ some repute
Een o’ the best in the North they said
O’ that there wiz nae dispute

An instant hit wi’ teammates an’ fans alike
His wing play fitted in jist gran’
Skill an’ goals were second nature
Jist got on wi’ the job in han’

He wiz at the hert o’ athin’ great
In an era o’ Michty Maroons Magic
Goals galore an’ a hat-fae o’ medals
Tae mIss onythin’ oot wid jist be tragic

The trophies they cam’ thick an’ faist
3 League Cups an’ 3 League titles, tap o’ the pile
Twa Aiberdeenshire Cup winners medals as weel
Brocht JC oot in that famous smile

Great Scottish Cup wins at Stranraer an’ Hamilton
Pit the opposition in a richt scare
First shirt sponsors in Scotland
John cwid richtly state  “I wiz there!”

Switchin’ on the Kynoch Park lichts
First Highland team wi’ sponsored beets
Big John wiz pairt o’ a’ that
Sae mony great Maroons feats

Nine different sarks he wore
He wid play onywye – ye ken
At a time fin Keith ruled the roost
An’ Kynoch Park wiz lik’ the Lion’s Den

Twa hat-tricks were nabbed by Oor John
Amun’ Aichty Sivin goals that he scored
Ye nivir sa’ onybiddy sae pleased for sure
Waatchin’ him celebrate, ye nivir got bored

Noo – a little kent fact aboot  young John 
Jist twa days efter he wiz born
Keith beat Turra’ 9-4 in the ‘Shire Cup
Leavin’ the Men fae the Haughs a‘ forlorn

Sadly, Nine glorious ‘eers cam’ till an’ eynd
O’ struttin’ his stuff at the “Field o’ Dreams”
A vital cog in that squad o’ players
Makkin’ up een o’ Keith’s greatest ivir teams

His Best Match o’ the Day?
Fin Janis said  “I dee”
A strike partnership made in Hivvin
There for abiddy tae see

Rachel an’ Rebecca were great signins’
Born intae the Curran Clan
John wiz ower the Moon
Smilin’ – as only he can

Grandkids Joshua an’ Emelia are noo star attractions
They are his  “Talk o’ the Toon”
His playin’ days lang gone
Bit of coorse – ONCE A MAROON ALWAYS A MAROON!!

HAPPY 7OTH BIRTHDAY JC III

Top o’ the League Husband, Faither an’ Granda’

© Charlie Simpson