CAMMY KEITH - 350 NOT OUT! 19.12.20

I kin mind fin JFK wiz slain
An’ fin man steppit on the moon
Fin Scotland won at Wembley in ‘67
It a ‘ happened fin I wiz a loon

Then, doon at Banff anither ‘een
It’s Cammy Keith that I must thank
For clockin’ up goal number 350
A real beauty for my memory bank

He jinked an’ weaved inside the box
It wiz in the meenit fifty three
An’ fired the Maroons intae the lead
A landmark addition tae his goalscorin’ spree

It wiz a goal o’ mammoth proportions
Fin the ba’ landed in the net
Were the Keith diehards celebratin?
262 goals for their team – You bet!

His team-mates swarmed a’ ower him
They kent fit it wiz a’ aboot
Iviry goal he’s scored is special
Ye can nivir coont Cammy oot

It’s fifteen ‘eer since he scored his first
At the young age o’ jist Aichteen
Against Brora – October 2005
Ended up – the finest Keith fans hiv ivir seen

Fit a pile o’ goals he’s scored
It’s been second nature tae the lad
A lovely guy aff the Park
Bit made opposing defenders o’ sae sad

His tally looks even better
He heeded Stateside for twa ‘eer
Fin he returned tae Kynoch Park
Maroons fans gave a michty cheer

Cammy wiz the toast o’ Balloch Road
He wiz scorin’  goals galore
Fin Formartine cam’ an’ grabbit him up
C K wiz a Maroon no more

At Pitmedden he kept on scorin’
Deein’ jist fit he diz best
Addin’ tae his considerable tally
Wi’ his trademark vigour and zest

Fower ee’ o’ net bulgin’ at North Lodge
Sa’ Aichty Aicht goals chalkit up in his name
Bit then the Maroons they cam’ a callin’
Cammy! - It’s time tae come hame!!

The No: 9 sark wiz on the same peg
He wiz jist as gweed as ivir
In front o’ goals still as deadly
Evadin’ defenders, nae maitter foo clivir

In modern times, a striker sae supreme
A goalscorer ye wid say, prolific
A six, a five, an’ five fowers
Plus 19 hat-tricks tae be specific

The superlatives they’ve a’ been said
Opponents spik through gritted teeth
Bit they’ll a’ stan’ in recognition
350 NOTCHES ON HIS BEETS – SHARPSHOOTER CAMMY KEITH!

© Charlie Simpson