THE EYND O’ A SCOTTISH CUP DROUGHT

Jings – it wiz nearly Twinty Five ‘eer
Since a Scottish Cup win at hame
Fin Fort William they cam’ a callin’
An’ they made it a michty tough game

Bit, we startit aff lik’ a whirlwind
Cammy Keith nabbed an early double
He’d broken a 65 year aul’ record
The veesitors cwid be in trouble

They didna’ panic, an’ got richt stuck in
An’ then richt oot o’ the blue
A crackin’ goal wiz pult back
Tae pit hame fans in a stew

Ah – bit Andy an’ Tommy the gaffers
Telt the boys fit tae dee at half-time
“Keep it goin’ in the second half
An’ we’ll get a win sae sublime”

Cammy cwid hiv scored some mair
Then young Logan Watt heided intae the net
Sighs o’ relief aroon’ the grun’
For the first roon’ we’re surely set

We piled it on an’on
Selfie, Brownie an’ Spinky nearly scored
We’re bound tae nab anither
In this gemme, ye cwidna’ be bored

The meenits were furlin’ by
Their goalie wiz bein’ a pest
Anither fine save he made
Bit then Liam Duncan scored wi’ great zest

That goalie wiz still a pain
There wiz only a fyow seconds left
A p’int blank stop fae Selfie
Bit Brownie pounced tae leave him bereft

Richt awa’ the ref blew his peeper
That wiz it – Time up!
Keith fans were wildly cheerin’
We’d knockit Fort oot o’ the Cup!

The boys a’ played their pairt
There wizna’ only weak links
Fae David Dey through tae James Brownie
As weel as the subbies – nae high jinks

Andy an’ Tommy are tae be commended
Able Captains o’ the Ship
Apairt fae that sag afore half-time
There wiz nivir anither blip

It’s been a lang time a comin’
For those o’ a Maroon persuasion
Bit a Scottish Cup win at hame
AIFTER 25 ‘EER – TRULY A GREAT OCCASION

© Charlie Simpson