MIGHTY MAROONS TAME ‘YOGI’

Stranraer 2 Keith 3

“Feed the Bear”- Celtic fans eest tae shout
Fin Big John “Yogi” Hughes wiz in full flight
Bit he hid gey slim pickins’ fin his Stranraer side
Hosted Keith in the Scottish Cup an’ were beaten oot o’ sight

Maybe “Feed Ally Christie” shud hiv been the battle cry
The “King o’ the Six Yard Box” heided hame a super double
Wi’ wee Charlie Elvin pullin’ the strings
The Maroons caa’sed Stranraer plunty o’ trouble

They werena’ supposed tae hae a chance
Big “Yogs” predicted a comfortable win
A Stranraer bookie hid 8-1 against Keith
Jeezo! - shockin’ odds – fit a sin

It wiz gaun tae be a cakewalk
Bit Harry ‘O’ he wizna’ daft
He’d deen a bit o’ hamewirk
Hiz Michty Maroons widna’ be saft

We cam’ oot wi’ a guns blazin’
Midfielders Charlie, Louis Duncan an’ Robbie Munro ruled the roost
Pushin’ forrit richt fae the aff
Surely in for an early boost

There wiz quarter an’ ‘oor on the clock
Fin we got aff the mark
A super Mike Winton cross heided hame by “King Ally”
Michty! - We were playin’ them aff Stair Park

We were weel in command – weel in control
Bit they livilled jist aifter half-time
Ah – bit five meenits later we were back in front
Wi’ anither Super Ally heider – oh sae sublime

Jings, bit they livilled again, wi’ a penalty
Hame fans thocht – Ha! Ha! Noo we’re set
Then “King Ally” wiz loppit doon in the box
An’ penalty ace Charlie strokit the winner richt intae the net

The victory wiz maybe lang in comin’
Bit fin  the referee peeped for the eynd o’ the game
Keith players an’ fans were celebratin’
It wid be a lang, but happy trip hame

There wiz 13 heroes ‘een an’ ‘a
Bobby Gray dominatin’ his goalmoo’
Bruce “Skipper” Martin an’ Jim Maxwell at full back
Nivir missed ony tackles, lik’ Dally an’Big Eck too

The midfield trio Charlie, Louis an’ Robbie were immense
Flyin’ winger Wintie at his very best
Centre Dod Simmers chased an’ harried
“King Ally’s “ twa heiders helped his side pass the test

Subbies John Curran an’ Gerry Graham
Did their bit, an’ Harry ‘O’ led fae the dug oot
Naebiddy wid argue for sure
Scottish Cup team o’ the day – nae doot

The class o’ the Maroons nivir forgotten
10th January 1976 – the day
Fin the Michty Keith dumpit Stranraer oot o’ the Cup
CLUB LEGENDS FOR IVIR – COME FIT MAY!

© Charlie Simpson